Recent Articles

කල දවස Location වල ගෙවිලා යනවා : අංජුලා ශානි


ආටක නාටක හරහා ඔබට වඩාත් සමීප වු ඇය අංජුලා ශානි.

* ඉතින් අංජුලා කෙහොමද ජීවිතේ?

ලොකේෂන්වල ගෙවිලා යනවා. ඩ්‍රාමා කිහිපයක් විකාශය වෙන්නත් තියෙනවා.

* ඔබේ ඇත්ත නම අංජුලා නෙවෙයි නේද?

ඔව්. මගේ ඇත්ත නම අංජානා ශාන්ති. මං මගේ ෆේස්බුක් එකවුන්ට් එක හැදුවේ අංජුලා ශානි නමින්. ඒක ගොඩක් ජනප්‍රිය වුණා. අංජානා ශාන්ති කියන නම වැඩිය ලස්සන නිසා වෙන්න ඇති මට නිර්මාණවලටත් වැඩියෙන් කතා කළා ඒ නමත් එක්ක. කෙටියෙන්ම කිව්වොත් අංජුලා ශානි කියන නමත් ජනප්‍රිය වුණා. මේ හේතුවෙන් මං දිගින් දිගම ඒ නමම භාවිතා කළා.

* ආටක නාටක කොටස් කීයකට ඔබ සම්බන්ධ වුණාද?

අම්මෝ කොටස් ගණනාවකටම හිටියා.

* ඊට පසුව රඟපෑ නාට්‍ය පෙළ මතක් කළොත්?

හිතුවක්කාරයා, පිණිදිය වැස්ස, පින්ක්, මං නැතිදා, ශාන්ත සොයිසා මහත්මයාගේ නාට්‍යකටත් කතා කරලා තියෙනවා.

* ඔබ තවමත් ප්‍රධාන චරිතයක් රඟපැවේ නැහැ නේද?

ඔව්. මට තාම ලැබුණේ අතුරු චරිත පමණයි. ඒ වුණත් කැපවීමකින් ලැබෙන කුමන හෝ චරිත රඟපානවා. කාලයක් යද්දී මටත් ප්‍රධාන චරිත ලැබෙයි. එතකම් ඉවසනවා.

* ඇයි ඔබ නිළියක් වුණේ?

හිතේ තිබුණු ආසාවට. පොඩි කාලේ ඉඳලා හිතාගෙන හිටියේ නිළියක් වෙන්නම තමයි. ඒ අතරේ මෝස්තර නිරූපිකාවක් වෙන්නත් හීන මැව්වා. ඒ බලාපොරොත්තු දෙකම ඉෂ්ඨ කරගත්තා මං.

* නිළියක් වෙන්න ගිහින් දුෂ්කරතාවලට මුහුණපාන්නත් ඇති?

ඒ ගැන නම් කියලා වැඩක් නැහැ. අපි අලුත් අය නිසා කට්ට කන අවස්ථා වැඩියි. ඒක මං හොඳට අත් විඳලා තියෙනවා. උදේ පාන්දරින්ම දර්ශන තලයට එන්න කියලා හවස් වෙනකම්ම තියාගෙන ඉඳලා හවස එක සීන් එකක් විතරක් කරල ගියපු අවස්ථා එමටයි. එහෙම වෙලාවලදී හිතෙනවා හිතලමදෝ අපව මෙහෙම රස්තියාදු කරන්නේ කියලා. මොන බාධක ආවත් මං මගේ ඉලක්කයට යනවා. මොන දේ වුණත් මං වැටෙන්නේ නැහැ.

* ඇතැම් නිර්මාණකරුවන්ගෙන් නවක නිළියන්ට අයුතු යෝජනා එනවා. ඔබටත් ඒක පොදුයි?

ඔව්. මටත් එහෙම යෝජනා ඇවිත් තිබෙනවා. ඒවාට අකැමැති වුණ නිසා අවස්ථාවනුත් අහිමි වුණා. මොනවා කරන්නද. වෙච්ච දේ ගැන නොසිතා පාඩුවේ ඉන්නවා එතකොට.

* අංජුලාගේ පවුලේ විස්තර මොනවද?

මගේ පවුලේ එකම ළමයා මම. අම්මයි තාත්තයි මමයි තමයි පවුලේ සාමාජිකයෝ.

* ඔබේ ගම?

පයාගල.

* ඉගෙන ගත් පාසල?

පයාගල රෝමාණු කතෝලික විදුහල.

* උපන් දිනය?

මාර්තු 31.

* ඔබ ගැන කෙටියෙන් හඳුන්වා දුන්නොත්?

හිනාවෙලා ඉන්න කැමැති කෙනෙක්.

සටහන - ප්‍රසාද් සමරතුංග
සේයාරූ - නිශ්ශංක විජේරත්න 

හිරු Super Dancer 'තිනේ­ශිකා නිසල්යා' කිව්ව කතාව...


පසුගියදා හිරු නාළිකාව පුංචි නැට්ටුවන් පිරිවරා ගනිමින් ප්‍රසාංගික රියැලිටි අත්දැකීමක අවසාන මහා තරගය ‘හිරු Super Dancer‘ අති උත්කර්ෂවත් අන්දමින් නෙළුම් පොකුණ රඟහලේදී පැවැත්වුණා. එහිදී ප්‍රථම ස්ථානය දිනා ගැනීමට තිනේශිකා නිසල්යා (ජින්නා) සමත් වුණා. හිරු Super Dancer උණුසුම යන්න කලින්ම මේ පුංචි තරුව එක්ක සිය සතුට බෙදා ගන්න අපි තීරණය කළා. මේ මොහොතේදී ඇය සමඟ ඇයගේ නර්තන ගුරුවරයාත් අපිත් එක්ක එකතු වුණා.

ජින්නා ඔබට දැනෙන සතුට වචන වලට පෙරළමුද?

ගොඩාක් සතුටුයි.

හැමෝම ජින්නා කියලා කතා කරන්නේ ඇයි?

මට එහෙම කියන්නේ ආදරේට. මම තිනේශිකා නිසල්යා. වයස අවුරුදු 13 යි. මම ඉගෙන ගන්නේ බප/කැල. විහාර මහාදේවී බාලිකා විද්‍යාලයේ 9 වසරේ. තාත්තා රැකියාව විදියට මාළු බිස්නස් කරන්නේ. අම්මා ගෙදර ඉන්නේ. මට මල්ලි කෙනෙක් ඉන්නවා.

මේ ගමනේ ආරම්භය ගැන මතක් කරමු?

අම්මාට කලින් වැඩිපුරම මේ තරගයට මාව යොමු කළේ ලොකු අම්මයි, අක්කයි. අක්කා තමා හිරු Super Dancer තරගයට අයදුම්පත් දැම්මේ. දහස් ගාණක් අතුරින් තේරී පත් වුණාට පස්සේ මුලින්ම මාව පළමුවැනි වටේට පුහුණු කළේ බාස්කර් සර්. දෙවැනි වටේට මගේ සර් ධනුෂ්ක සර් පුහුණු කළේ. පළමුවැනි වටේට මාගේ සර් හිටියේ නැහැ. ඊට පස්සේ ලලිත් සර්, ධනුෂ්ක සර් මට පුහුණුවීම් කරන්න උදවු කළා.

ජින්නා නර්තනයට යොමු වෙන්නේ කොහොමද?

මම පොඩි කාලේ ඉඳන්ම නර්තනය කළා. තාත්තා ජිම්නාස්ටික් කරපු කෙනෙක්. ඒ නිසා තාත්තා තමා මාව නර්තනය පැත්තෙන් ඉදිරියට යැව්වේ.

මීට පෙර නර්තනය පැත්තෙන් වෙනත් තරග සඳහා සහභාගී වෙලා තියෙනවද?

හිරු Super Dancer මගේ පළමුවැනි තරගය. හැබැයි මම 2016 අවුරුද්දේ දෙරණේ Little star තරගයට ගියා. එතැනදී මම 48 න් කැපුනා.

හිරු Super Dancer තරගයේදී ඔබ විවිධ අවදානම් සහිත නර්තනාංග ඉදිරිපත් කළා. ඒ දේවල් ඉදිරිපත් කරද්දී බයක් දැනුණේ නැද්ද ?

සර් විශ්වාස නිසා බයක් දැනුණේ නැහැ.

ඔබව මේ තැනට ආවේ ඔබගේ ගුරුවරයා නිසා කියලා කිව්වොත්.

ඔව්. ලලිත් සර් කියන්නේ මට තාත්ත කෙනෙක් වගේ. ඔහු ගොඩක් මහන්සි වුණා මාව මේ තැනට ගෙනෙන්න. මේ වේලාවේදී මාගේ සර් ට මම ගොඩක් ස්තුතිවන්ත වෙනවා.

මේ තරගාවලියේදී වැඩිම Golden Medals ප්‍රමාණයක් දිනා ගන්න ඔබට හැකි වුණා?

ඔව්. සතුටුයි ඒ ගැන. හොඳ තරගයක් දීලා නේ ගත්තේ.

ජින්නාගේ ජීවිතේ අලුත් පිටුවක් පෙරළුණා. අනාගතය ගැන මොනවගේ බලපොරොත්තුවක් ද තියෙන්නේ?

මම ආසයි ජාත්‍යන්තර තරගයකට මුහුණ දෙන්න. හැබැයි තනියම නෙමෙයි සර් එක්කයි යන්න බලාපොරොත්තුව. දැනට විදෙස් ප්‍රසංග තුනකට ආරාධනා ලැබිලාත් තියෙනවා.

මේ මොහොතේදී ඔබට ලොකු පිරිසක් සහයෝගය දෙන්න ඇති. ඒ අයව මතක් කරමු නේද ?

ඔව්. මාව මේ තැනට ගෙන්න, මට උදවු කළ ලංකාවාසී ලෝකවාසි සියලු දෙනාටම ස්තුතිවන්ත වෙනවා. එයාලා නිසා තමා මම මේ තරගය දින්නේ. විශේෂයෙන් මාගේ පවුලේ සියලු දෙනාට, ලලිත් සර් ඇතුළු කණ්ඩායමට සහ හිරු නාළිකාවට ගොඩක් ස්තුතිවන්ත වෙනවා.


ඊළඟට අපි කතාවට එකතු කර ගත්තේ ජින්නාගේ ගුරුවරයා වූ ලලිත් පැරකුම් ව

ජින්නාගේ පුහුණුකරු විදියට දැනෙන සතුට මොනවගේද?

වචන වලින් කියන්න බැරි තරම් සතුටුයි. මේ ජීවිතයේ ලබන ලොකුම සතුට අත්විඳින ගමන් ඉන්නේ.

ඔබට ජින්නා ව තරගකාරියක් විදියට මුණ ගැසෙන්නේ කොහොමද?

හිරු Super Dancer පළමු වටයේ තරග සඳහා මගේ පන්තියේ ළමයිනුත් ගියා. එතැනදී මම ජින්නගේ පළමුවැනි ඉදිරිපත් කිරීම දැක්කා. මම එයාව අධ්‍යයනය කළා. මම ඒ වෙලාවේ දැන ගත්තා මේ ලෝකේ කාටවත්ම කරන්න බැරි දේවල් ඇයට කරන්න පුළුවන් කියලා. ඇත්තටම ජින්නා වැනි දක්ෂයෙක් හම්බ වෙනතුරු මම බලාගෙන හිටියේ.

අවදානම කියන් දේ ජින්නාගේ නර්තනය තුළ වැඩිපුරම දකින්න ලැබුණු දෙයක්.

ඔව්. හැමදේටම තියෙන ආත්ම ශක්තිය ජින්නා ළඟ තිබුණා. මම ජින්නට හැමවෙලාවෙම කිව්වා දෙයක් 'අපි සාමාන්‍ය නර්තනයක් කරලා වැඩක් නැහැ, සාමාන්‍ය නර්ත ශිල්පිනියක් වෙලත් වැඩක් නැහැ ' කියන එක. අපි මේ දේ වෙනස් කරන්න ඕන. මිනිස්සු අතරට යන්න නම් වෙනස් දෙයක් කරන්න ඕන කියලා මම එයාට කිව්වා. මම හැමදෙයක්ම එයාට ඉගැන්නුවේ ප්‍රමිතියකට ඉගෙන ගෙනයි. කේබල් ඩාන්ස් පවා මම හොඳට ඉගෙන ගෙන තියෙනවා. ඔයාට මම තව දෙයක් කියන්නම්, මම තමයි ආදරේට 'ජින්නා' කියලා නම දැම්මෙත්. අපි ගොඩක් අඩුපාඩුකම් යටතේ ඉගෙන ගත්තේ.

අද ජින්නා ඉන්න තැන ඔබ ට දැනෙන හැඟීම මොනවගේද?

මම බය නැතුව කියනවා කේබල් ඩාන්ස්, ට්‍රැඩිෂනල් ඩාන්ස්, හිපොප් ඩාන්ස් මේ කියන ඕනෑම ස්ටයිල් එකේ ඩාන්ස් කරන්න පුළුවන් ලෝකයේ ඉන්න එකම ඩාන්සර් ජින්නා කියලා. අද මට දුකක් නැහැ අද මම ජින්නව හම්බවෙන්න යන නිසා. නමුත් හෙට ඉඳන් මට ජිවත් වෙන විදිය හිතා ගන්න බැහැ. හැමදාමත් මම ජින්නාට ආදරෙයි. හැමෝම හිතන්නේ ජින්නයි මමයි තාත්තයි දුවයි කියලා. ඉතින් මම හැමවෙලාවෙම ජින්නා ව දැක්කේ ,මගේම දරුවෙක් විදියට ජින්නා වෙනුවෙන් පිටිපස්සේ ඉඳන් පණ වුණත් දෙන්න මම ඉන්නවා. ජින්නා කියන්නේ මේ ලෝකේ වෙනස් කරන්න පුළුවන් කෙනෙක්. දැනටමත් රටවල් කිහිපයකින්ම ආරාධනා ලැබිලා තියෙනවා. ඉතින් ජින්නත් එක්ක පිටුපසින් එයාට හයියක් වෙලා මම හැමදාම ඉන්නවා.

ලලිත් ඔබ ට හිරු Super Dancer වේදිකාව ලැබෙන්නේ කොහොමද?

අපි කොච්චර දක්ෂ වුණත් අපිට ලංකාවේ තැනක් තිබුනේ නැහැ. මම හිරු මෙගා ස්ටාර් වේදිකාවේ සහය නර්තන ගුරුවරයෙක් විදියට ඉගැන්නුවා. පසුව විරාජ් සර්,දමිත් සර් මාව දැකලා මට කතා කළා. ඒ අය මට කිව්වා, පුතා හිරු Super Dancer තරගයක් තියෙනවා කියලා. විරාජ් සර් ගේ කතා කිරීම මත තමයි මම Super Dancer තරගයට ඇතුළු වුණේ. හිරු එකෙන් දීපු මේ අවස්ථාව නිසා තමා අද අපි මෙතැන ඉන්නේ නැත්නම් අපි කොච්චර දක්ෂ වුණත් අද මෙතැනට එන්න බැහැ.

ශෙහානි කහඳවල චෝදනා ප්‍රති­ක්ෂේප කර­යි.


ඇය නමින් ශෙහානි කහඳවල. ක්ෂේත්‍රයට ඇවිත් ටික කාලයක් ඇතුළත ඇය ලොකු ජනප්‍රියත්වයක් ලබා ගෙන අවසන්. පුංචි තිරයේ පෙම්වතිය වු ඇය එක්කයි අද හැඩ වෙන්නේ.

මේ දවස්වල මොනවද වෙන වැඩ කටයුතු?

නාට්‍ය දෙකකට ආරාධනා ලැබිලා තියෙනවා. හිරු ටීවී එකේ රියැලිටි වැඩසටහනකට මෙගා ස්ටාර් සීසන් 2 ට සහභාගී වෙනවා. ඒකයි ‘සඳපිනි වැස්ස‘ ටෙලි නාට්‍යයේ වැඩ කටයුතු කර ගෙන ඉන්නවා.

හිරු මෙගා ස්ටාර් කියන්නේ ෂෙහානි ගේ පළමුවැනි රියැලිටි අත්දැකීමද?

නැහැ. මම හිතන්නේ දෙවැනි රියැලිටි අත්දැකීම. අනිත් ඒවාට සාපේක්ෂව මේ තුළින් ගොඩක් ජනප්‍රියයි මම.

සුජාතා ටෙලි නාට්‍යයෙන් පස්සේ ඔබව නැවත දකින්නේ සඳපිනි වැස්ස ටෙලි නාට්‍යයෙන්?

ඔව්. සුජාතා එකෙන් පස්සේ මම ගොඩ කාලෙකින් තමා ටෙලි නාට්‍යකට සම්බන්ධ වුණේ.

නිහඬ වෙන්න හේතුව ?

එහෙම නැහැ. හැමෝටම කාල වකවානු තියෙනවා නේ. මම කියන්නේ එක්ස්පයර් වෙනවා කියන එක නෙමෙයි. අපිට හැමදේම හරියන කාලයක් තියෙනවා. ඉතින් සමහරවිට මටත් එහෙම වෙන්න ඇති. මම කියන්නේ නැහැ මට වැඩ ආවේ නැහැ කියලා. වැඩ ආවා. මම හිතනවා හැමදේට ම හොඳ කාලයක් තියෙනවා කියලා.



ශෙහානි ගේ සුන්දරත්වය නිසා වැඩිපුර මියුසික් වීඩියෝස් සඳහා අරාධනා ලැබුණත් සීමිත ප්‍රමාණයක් ලු භාර ගන්නේ. ඇත්තද මේ කතාව?

එහෙම නැහැ. දැන් නම් මම ගොඩක් සීමා කරගෙන තියෙන්නේ. මම එක දිගටම මියුසික් වීඩියෝස් කළා. මට තේරුණා, අපි මේ විදිහට මිනිස්සුන්ට පෙනෙන්න ගත්තොත් අපි එපා වෙන්න ගන්නවා. අපි හොඳ දෙයක් කරන්න ඕන. හැමදාම ඕන එකයි එපා එකෙයි ඉඳලා වැඩක් නැහැ. අපි වෙනම දෙයක් කරන්න ඕන. මිනිස්සුන්ට එකම දේ දැකලා එපා වෙනවා. මම දැන් හැම එකකටම යන්නේ නැහැ . හොඳ වැඩක් අවොත් භාර ගන්නවා.

දැන් ෂෙහානිට ටෙලි නාට්‍ය සඳහා ඒ තරම්ම ආරාධනා ලැබෙන්නේ නැහැ කියන්නේ ඇත්තද?

එහෙම නැහැ. මෙහෙමයි ඕනෑම මනුස්සයෙකුට කරන්න පුළුවන් සීමාවක් තියෙනවා නේ. අපි කියමු අපිට ටෙලි නාට්‍ය තුනකට ආරාධනා ලැබුණා කියලා. එතකොට ඒ තුනම භාර අරගෙන සතියකට දින වෙන් කරන්න ගියාට පස්සේ කොහොමද තුනේම වැඩ කරන්නේ. කරන්න බැහැ නේ. මට කරන්න පුළුවන් ප්‍රමාණයක් තියෙනවා. ඒ ප්‍රමාණයට විතරයි මම වැඩ භාර ගන්නේ.

ශෙහානි පුංචි තිරයේ පෙම්වතියක් වී අවසන්. නමුත් සැබෑ ජිවිතේ පෙම්වතියක් වෙන්න කාලය ඇවිත් නේද?

අනේ මට කවුරුත් ඕනේ නැහැ. මම මාගේ පාඩුවේ වැඩ ටික කරගෙන ඉන්නවා.

ආදරෙන් පැරැදිලා වගේ කතා කරන්නේ ඇයි?

අයියෝ නෑ නෑ. කවුරුත් ඕන නෑ කියලා කියන්නේ මාගේ පාඩුවේ වැඩ ටික කරගෙන ඉන්න පුළුවන් කියන එක. නැතුව ආදරෙන් පැරැදිලා නැහැ. ඕන කාලේදී ඒ ගැන හිතනවා.

පසුගිය කාලයේදී ඔබට රංගනයේ සිටින ප්‍රවීණ පිරිසකගෙන් චෝදනාවක් එල්ල වුණා, ඔබ අඳින පළඳින ඇඳුම් සම්බන්ධව. ඒ එල්ලවුණු චෝදනා භාර ගන්නවද?

මම ඒ චෝදනා ප්‍රතික්ෂේප කරනවා. මෙහෙමයි අපි සැලකිලිමත් වෙන්න ඕන. ඒවා ඉතින් ඇත්තටම බැලුවොත් මාගේ ඒ වෙච්ච දේ පොඩි සාමාන්‍ය දෙයක්. මීට වඩා දේවල් ලංකාවේ වෙලා තියෙනවා. ඉතින් මං ඒවා ගණන් ගන්නේ නැහැ සත පහකටවත්. හැබැයි මම අවවාද පිළිගන්නවා. මම වැඩිහිටයන්ට ගරු කරනවා. වැරැද්දක් වුණාට පස්සේ ඒ වැරැද්ද හදා ගෙන ඉදිරියට යනවා. නමුත් මම කියන්නේ ඒ දේ මහා ලොකුවට විවේචනය කරන්න දෙයක් නෙමෙයි. මොකද ඊට වඩා දේවල් මේ ලංකාවේ දැනටත් වෙනවා.


ෂෙහානි කියන්නේ හිතුවක්කාර, වැඩිපුර කේන්ති යන චරිතයක්ලු. ඒ දේට එකඟ ද?

නෑ. එහෙම නෑ. මෙහෙමයි මට අනවශ්‍ය දේවල් කිව්වොත් මට අදාළ නෑනේ. මට අදාළ දේවල් විතරයි මම භාර ගන්නේ. ඉතින් ඕනෑම මනුස්සයකුට කේන්ති යනවා, සතුටු හිතෙනවා. අපිට මනුස්ස ජිවිතයේ තියෙන්න ඕන දේවල් හැම මනුස්සයකුටම තියෙනවා. මමත් එහෙම කෙනෙක්. හැබැයි මම කේන්ති අරගෙන අනිත් අය වගේ රණ්ඩු කරන්න යන්නේ නැහැ. මම සද්ද නොකර පැත්තකට වෙලා ඉන්න කෙනෙක්. මම හරිම සංවේදී. මට හරියට දුක හිතෙනවා. ඉතින් මට තරහා යනවා. ඒත් ඒ දේ මම පෙන්වන්නේ නැහැ.

මම ලංකාවේ සින­මා­වට කැමැ­තියි : පල්ලවී සුභාෂ්.


මේ දිනවල තිරගත වන මහාචාර්ය සුනිල් ආරියරත්නයන් අධ්‍යක්ෂණය කළ එච්. ඩී. ප්‍රේමසිරි නිෂ්පාදනය කළ ‘බිම්බා දේවී හෙවත් යශෝධරා‘ චිත්‍රපටයේ යශෝධරා චරිතය නිරූපණය කරන භාරත නිළි පල්ලවී සුභාෂ් චිත්‍රපටයේ මංගල දර්ශනයට සහභාගිවීමට ලංකාවට පැමිණියා. චරිත නිරූපණයෙන් පසුව පළමුවරට තමන්ගේ රංගනය දුටු පල්ලවී යශෝධරා චරිතය පිළිබඳව දැක්වූ ප්‍රතිචාර දැනගන්නට පල්ලවී හමුවී ඒගැන විමසන්නට අපට අවස්ථාව ලැබුණා. එහිදී යෙදුණු පිළිසඳරේදී ඇය දැක්වූ ප්‍රතිචාරයයි මේ.

පල්ලවී ඔබ යශෝධරා චිත්‍රපටයේ කළ රංගනය දැක්කාම මේ චරිතය දැනුණේ කොහොමද?

මම මේ චිත්‍රපටය දැක්කේ ඊයේ මංගල දර්ශනයේදි. මා සමඟ මගේ මවත් චිත්‍රපටය නරඹන්නට පැමිණියා. එහිදී මම හරිම හැඟුම්බර වුණා. ඇත්තෙන්ම කියනවා නම් මම මේ චිත්‍රපටයට හදවතින්ම ආදරෙයි. ඒ වගේම මට කියන්න බැරිතරම් සතුටුයි.

මේ චිත්‍රපටය නරඹන්නට පැමිණ සිටි සියලුම දෙනාම මට ධනාත්මක ප්‍රතිචාර දක්වමින් සුබ පැතුවා. එය හරිම ආඩම්බරකාරී මොහොතක් වුණා මට මොකද ඒ අය මගේ හැකියාව ඉහළින්ම අගය කළා. අවසානයේ මම බලාපොරොත්තු වුණු ප්‍රතිඵලය ලැබුණා.

ඔබ නිරූපණය කළ යශෝධරා චරිතය දැනෙන්නේ කොහොමද?

මේ චරිතය මටම අභියෝගයක් වුණා. මම පළමුවරට සුනිල් සර් ඇතුළු කණ්ඩායම මුණගැසුණාම මගේ පළමු ප්‍රතිචාරය වුණේ ‘‘වාව්‘‘ කියන එකයි. මොකද මම භාෂාව දන්නේ නැහැ. ශ්‍රී ලංකාවේ සිනමා කර්මාන්තය පිළිබඳව මීට පෙර දැනගෙන හිටියේ නැහැ. මම මෙහි නිෂ්පාදන කණ්ඩායම මුණ ගැසුණාම ඒ අය මට පැහැදිලි කළා මේ චිත්‍රපටය ගැන සහ මෙහි අධ්‍යක්ෂවරයා කවුද මේ චරිතයෙන් කියැවෙන්නේ කොයි වගේ කෙනෙක්ද ගැනද කියලා. ඒත් ඒ මොහොතේ මට මේ ගැන එතරම් හොඳ අදහසක් තිබුණේ නැහැ ශ්‍රී ලංකාවේ චිත්‍රපට කර්මාන්තය ගැන වගේම මේ චිත්‍රපටය පිළිබඳවත්. පසුව මම අවබෝධ කරගත්තා යශෝධරා චරිතය හරිම ප්‍රබල ඒ වගේම හරිම නිවුණු, තැන්පත් එකක්.

භාෂාව පවා නොදැන ඔබ කොහොමද මේ චරිතය මේ තරම් සාර්ථකව නිරූපණය කළේ.

මම මේ පිරිස පළමුවරට මුණ ගැසුණාම, විශේෂයෙන් සුනිල් සර් මුණ ගැසුණු අවස්ථාවේ මේ චරිතය ගැන කිව්වා.ඒ වගේම සුනිල් සර්ගේ එකම සහ පළමු තේරීම මම කියන එක දැනගත්තාම ඒ මෙහොතේ ඇත්තටම මම පුදුම වුණා මේ අය කොහොමද මාව හොයාගත්තේ කියලා. ඉන්පස්සේ මෙහි රූගත කිරීම් වලට පෙර වැඩමුළු කිහිපයක් තිබුණා. එහිදී අවබෝධය ලබාදුන්නා භාෂාව ගැන. ඉතින් රූගත කිරීම් වලට පෙර මම හොඳ අවබෝධයක් ලබා ගත්තා මේ චරිතය මම කොහොමද රඟපාන්නේ කියලා. ඊට පස්සේ මම ඒ වැඩමුළු සම්පූර්ණ කළා. ඒක මට ගොඩක් උපකාරී වුණා. ඊයේ මම මේ චිත්‍රපටය දකින තුරු මම හිටියේ තරමක බියකින්. ඊයේ තමයි මට ඇත්තටම සිතට සැනසීමක් දැනුණේ.


ඔබ මේ චරිතය රඟපාන්නට පෙර ඒගැන හැදෑරීමක් කළාද?

ඔව්. මම ගොඩක් පොත් කියෙව්වා. ඒවා ගොඩක්ම හින්දියෙන් ලියූ පොත්පත්. ඒ වගේම මෙහි වැඩමුළු වලට සහභාගීවුණා. ෂූටින් වලට කලින් මම යශෝධරා චරිතය පිළිබඳව හොඳ අවබෝධයක් ලබාගෙන තමයි ආවේ.

මෙහි අධ්‍යක්ෂ සුනිල් ආරියරත්නයන් ගැන මොනවද ඔබ සිතන්නේ.

ඇත්තටම මම මීට පෙර මේ වගේ දැවැන්ත චරිතයක් රඟපාලා තිබුණේ නැහැ. එහෙත් සුනිල් සර් ඒ සඳහා මාව තෝරාගෙන තිබුණා. සුනිල් සර් මා ගැන විශ්වාසය තබා තිබුණා මම මේ චරිතය හරියටම කරයි කියලා. එය ඔහුගේ නිවැරැදි තෝරාගැනීමක්. ඇත්තටම ඔහු විශිෂ්ට ගනයේ අධ්‍යක්ෂවරයෙක්.

ඔහු මට පූර්ණ නිදහස දුන්නා මට නිදහසේ මේ චරිතය කරන්න. ඒ වගේම මේ චරිතය ගැන අපි ගොඩක් සාකච්ඡා කළා.

ඊට පස්සේ තමයි මම හොඳ අවබෝධයක් ලබාගත්තේ මේ චරිතය කොහොමද කරන්න ඕන කියලා.

ඒ වගේම මම කැමැතියි රඟපාන විට මගේ මුහුණේ සැබෑ ස්වරූපයෙන්ම පෙනී සිටින්න. ඒ වගේම මට මේ චරිතයේදි අඬන්න ග්ලිසරින් ඕන වුණේ නැහැ. මම පුරුද්දක් විදිහට සෙට් එකේ ග්ලිසරින් පාවිච්චි කරන්නේ නැහැ. නමුත් මට කිසියම් කාලයක් අවශ්‍යයයි ඊට අනුගත වෙන්න.

ඇත්තටම සුනිල් සර් එය හොඳට අවබෝධය කරගෙන තිබුණා. ඒ වගේම ඒකට සතුටු වුණා. ඒ නිසාම මට අවශ්‍ය කාලය ලබා දුන්නා. ඒ වගේ අවස්ථාවලදි මට චොකලට් පවා දුන්නා නිදහසේ මට කාලය ගන්න. ඇත්තටම අපි වැඩකළේ පවුලේ අය වගේ. මෙය ඔහුගේ 22 වැනි චිත්‍රපටය. ඔහු විශාල අත්දැකීම් ඇති කෙනෙක්. මට මගේ රංගන ජීවිතයේ හමුවුණු සුවිශේෂී අධ්‍යක්ෂවරයෙක් ඔහු. මමත් වාසනාවන්තයි ඔහු වැනි ප්‍රවීණ අධ්‍යක්ෂවරයකු යටතේ රඟපාන්න ලැබීම. ඔහුගේ චිත්‍රපටයක රඟපාන්න ලැබීමත් මට ලොකු ගෞරවයක්.

ඔබ මීට පෙර රඟපා ඇති චරිත සමඟ යශෝධරා චරිතය සංසන්දනය කළහොත්.

මෙය සැබැවින්ම මගේ රංගන ජීවිතයේ මට නිරූපණය කළ අසීරුම චරිතය කිව්වොත් නිවැරැදියි. ඒ මොකද යශෝධරා චරිතය රඟපෑම හැම වෙලාවෙම මට අභියෝගයක් වුණා.

මෙහි කතා කරන්න ඕන භාෂාව වෙනස්. වැඩ කරන පිරිස වෙනස්. චරිතය වෙනස් මේ වගේ ගොඩක් දේවල් නිසා ඇත්තටම මේ චරිතය මට ජීවිතයේ ලොකුම අභියෝගය වුණා.

වෙනස් භාෂාවකට අනුව කතා කිරීමේ අභියෝගය ඔබ ජයගත්තේ කොහොමද?

මට මේ පිළිබඳව පැහැදිලි කරන්න පිරිස හිටියා. ඒ වගේම හැම දෙබසක්ම හින්දියෙන් බෝඩ්වල ලියලා තිබුණා. මම ඒවා බලාගෙන තමයි දෙබස් කිව්වේ.

රංගන ශිල්පිනියක ලෙස ඔබට වඩාත්ම ලෙහෙසි බොලිවුඩ් චිත්‍රපටද, මරාතිද සිංහලද?

රංගන ශිල්පියකුට තමන් රඟපාන්නේ බොලිවුඩ්ද, හොලිවුඩ්ද, මරාතිද, සිංහලද කියන දේ වැදගත් නැහැ. අවශ්‍ය වන්නේ තමන් කරන චරිතය සියයට සියයක් සාර්ථකව ඉදිරිපත් කිරීම පමණයි.

සිද්ධාර්ථ කුමරා සහ යශෝධරා කුමරියගේ ආදරය සංසාරගතව එන සැබෑ ආදරයක්. ඔබ මෙය දකින්නේ කොහොමද?

ඇත්තටම ඒක හරිම පුදුමයි. මම පෙර ආත්ම වල මේ දෙදෙනා ඉපදී සිටියා කියන එක දැනගෙන හිටියේ නැහැ. සුනිල් සර් මට ඒ ගැන පැහැදිලි කළාම තමයි මම දැනගත්තේ.

ඔබ වඩාත් කැමැති රාණි ධර්මා චරිතයටද? යශෝධරා චරිතයටද?

මම මේ චරිත දෙකටම කැමැතියි. මොකද මේ චරිත දෙකම මට ලොකු අභියෝගයක් වුණා. ඒ වගේම මේ චරිත දෙකම මගේ හදවතට දැනුණු දෙකක්.

ලංකාව සහ ලංකාවේ ජනතාව ගැන මොකද හිතෙන්නේ.

ලංකාව හරිම සුන්දර රටක්. අපි රූගත කළ තැන් හරිම ලස්සනයි. ඒවගේම මෙහි ජනතාවත් හරිම හොඳයි. ඒ වගේම මම කැමැතියි උඩරට ඔසරිය (Kandiyan Saree) අඳින්න.

මෙය බෞද්ධ චිත්‍රපටයක්. ඔබ මේ ගැන කලින් දැනුවත්වී සිටියාද?

මම ඉන්දියාවේ මහාරාෂ්ට්‍ර ප්‍රාන්තයේ ඉපදුණේ මරාති පවුලක. මගේ ආගම හින්දු. මම මීට පෙර බුද්ධාගම ගැන දැනගෙන හිටියේ නැහැ. නමුත් රාණි ධර්මා ලෙස රඟපාද්දී ධර්මාශෝක පසුව බුද්ධාගම වැළඳගත් බව දැනගෙන හිටියා.

නිළියක ලෙස ඔබ ගැන තොරතුරු ටිකක් දැනගන්න කැමැතියි.

මම තියටර් ඇක්ටර් කෙනෙක්. ඒ වගේම නිරූපණ ශිල්පිනියක්. ටීවී ඇක්ටර් කෙනෙක්. ක්ෂේත්‍රයට ඇවිත් වසර 16 ක් පමණ වෙනවා. හින්දි සහ මරාති චිත්‍රපටවල රංගන ශිල්පිනියක්ලෙස කටයුතු කරනවා. වැඩියෙන්ම රඟපාලා තියෙන්නේ මරාති චිත්‍රපටවල. දැනට චිත්‍රපට 25 ක් පමණ කරලා තිබෙනවා.

ඔබට ඉදිරියේදී ලංකාවේ සිනමා නිර්මාණවලට දායක වෙන්න ආරාධනා ලැබුණොත්.

ඇත්තටම මම ලංකාවේ සිනමාවට කැමැතියි. ඒ නිසා මම තව ගොඩක් චරිත ඉදිරියේදී කරන්න ආසයි. ඒක මට ලොකු අභියෝගයක් වේවි. ඒත් මම ඒකට ආසයි.

මගේ ළඟ බොරු වැඩ නෑ : වොල්ගා කල්පනී


මේ දිනවල විවිධ චරිත තුළින් ප්‍රේක්ෂකයන්ගේ ආදරය සොයා යන ඇය එක්කයි. ඇය නමින් වොල්ගා කල්පනී.

අද නිවාඩුයි වගේ දෙන්නටම?

ඔව්. හර්ෂණටයි මටයි අද නම් ගොඩක් දවසකින් ගෙදර විවේකීව ඉන්න ලැබුණා. වෙන දවස්වලට ෂූටින් වැටෙනවා නේ.

ඉතින් වොල්ගා කොහොමද ජීවිතේ?

බොහොම නිදහසේ සතුටින් සැහැල්ලුවෙන් ජිවත් වෙනවා. විවාහ වුණා කියලා ලොකු වෙනසකුත් නැහැ.

කලා ක්ෂේත්‍රයේ ඔබ හා සමකාලීන විවාහ ජීවිත ගෙවන අයත් එක්ක බලද්දී හර්ෂණ හා වොල්ගා වැඩිය දකින්න ලැබෙන්නේ නැහැ ඇයි ඒ ?

ඔව්. ඒකට හේතුව අපේ දේ ලෝකෙට පෙන්වන්න අවශ්‍ය නැහැ . හර්ෂණ කියන්නේ ප්‍රේක්ෂකයෝ ආදරේ කරන රංගන ශිල්පියෙක්. වොල්ගා කියන්නෙත් ප්‍රේක්ෂකයෝ ආදරේ කරන රංගන ශිල්පිනියක්. ඉතින් ඒකත් එක්ක අපේ පෞද්ගලික දේවල් එහෙම නැත්නම් බොරුවට,මම කියන්නේ ටීවී එක ඉස්සරහට ගිහිල්ලා බොරුවට පෙනී ඉඳලා වැඩක් නැහැ ඇතුළේ ඒක නැත්නම්. මාව ආශ්‍රය කරන යාළුවෝ මට කියන දෙයක් තමා 'වොල්ගා ගේ බොරු ෂෝ නෑ' කියලා. පාටීස් වලට සහභාගී වෙනවා. නමුත් අපේ ප්‍රතිපත්තියක් තියෙනවා පෞද්ගලික යාළුවකුගේ හැර වෙන පාටීස් වල ඉඳලා ටික වෙලාවකින් එනවා කියන එක. ඒ දේ අපි පුරුද්දක් කරගෙන තියෙනවා. මෑත කාලීනව ඇවිත් ඉන්න නිරූපිකාවෝ නිළියෝ කියලා හිතාගෙන ඉන්න කට්ටියක් ඉන්නවා නේ. ඒ අය පාටි වලට ගිහින් ඩාන්ස් එකක් you tube දාලා ජනප්‍රිය වෙන්න හදනවා. අනේ මං දන්නේ නැහැ මට නම් එහෙම දේවල් හිතිලා නැහැ. මගේ ළඟ බොරු වැඩ නැති නිසා තමයි වැඩිය පෙන්න නැත්තේ.

වොල්ග - හර්ෂණ සුන්දර කැදැල්ලට අලුත් අමුත්තෙක් ගෙනෙන්න අදහසක් නැද්ද ?

කැමැතියි. මම කොහොමත් දරුවන්ට කැමැතියි. නමුත් මම බුද්ධාගමේ. බුදුන් වගේම දෙවියෝත් අදහන කෙනෙක්. ඉතින් මම විශ්වාස කරනවා මට අවශ්‍ය වෙලාවට ඒ දේ ලැබෙයි. ජීවිතේ හැමදේම නිසි වෙලාවට වුණා වගේම දෙවියෝ ඒ කෙනා දෙන දවසක් ඇති නේ. ඒ වෙනතුරු ඉන්නවා.

රංගන වැඩ කටයුතු ගැන කතා කරමු.

ටෙලි නාට්‍ය කිහිපයකම මේ දවස්වල ඉන්නවා. ස්වර්ණවාහිනියේ 'පාරා' ටෙලි නාට්‍ය විකාශය වෙනවා. ඒවගේම ජනක සුරංජිත් මහත්මයා අධ්‍යක්ෂණය කරන 'අපේ ආදරේ' ටෙලි නාට්‍යය. පැහැසරා නාට්‍යයෙන් මම අයින් වෙලා ඉන්නේ. ඔය ටෙලි නාට්‍යවලට තමයි රංගනයෙන් දායක වෙන්නේ.

ඒ කියන්නෙ නාළිකා කිහිපයකම වොල්ගා මේ දවස්වල දකින්න ලැබෙනවා.

මටත් මේ ළඟදි කෙනෙක් මතක් කළා ටෙලි නාට්‍ය 4ක් යනවා නේද කියලා. ඉතින් සතුටුයි. සාමාන්‍ය සතුටක් තියෙනවා. මොකද ප්‍රේක්ෂකයෝ මට නිතරම හම්බවෙන්න ලැබෙනවා නේ විවිධ විවිධ චරිත හරහා.

තරුලි කියන චරිතය වොල්ගගේ සැබෑ ජීවිතයට යම් සමානකමක් දක්වනවා නේද?

නෑ. තරුලියි වොල්ගයි කොහෙත්ම සමාන නැහැ. තරුලි ආදරේ පස්සෙන් යනවා. වොල්ගා ආදරේ පස්සෙන් යන කෙනෙක් නෙමෙයි. තරුලි ආදරේ කියන දේ බලෙන් කොහොමහරි ලබා ගන්න කෙනෙක්. ඉතින් එහෙම බලනකොට තරුලියි, වොල්ගයි කොහෙත්ම සමාන නැහැ. නමුත් දඟ පැත්තෙන් බලද්දී නම් දෙන්නගේ පොඩ්ඩක් සමානකමක් තියෙනවා. කොහොමත් වොල්ගා කියන්නෙත් දඟ ළමයෙක්.

මේ දස්වල හර්ෂණයි වොල්ගයි ටීවී බලන්න හරියට රණ්ඩු වෙනවලු නේද?

කවුද කිව්වේ...? අනේ එහෙම නැහැ.

ඇයි දෙන්නගෙම ටෙලි නාට්‍ය, නාළිකා කිහිපයකම විකාශය වෙනවා නේ?

ඔව්. මෙහෙමයි ඇත්තටම ටෙලි නාට්‍ය යන වෙලාවට අපිට ටෙලි නාට්‍ය බලන්න වෙන්නේ නැහැ. ඒව බලන්න වෙන්නේ peo tv එකෙන් නැත්නම් you tube එකෙන් .

තීක්ෂණගේ ඇබ්බැහිය ගැන බිරිය අනුරාධා කී කතාව..


පෙම්වතා විදියට හිටපු තීක්ෂණ දැන් කොහොමද දැනෙන්නේ?

කිසිම වෙනසක් නෑ. ඒ ආදරේමයි. ඒ රැකවරණය තාම තියෙනවා. එකම කෙනා තමයි තාමත් ඉන්නේ. හරිම සුබවාදී විදියට ඉන්නේ.

පෙම්වතා කාලේ තරුණියන්ගේ ආකර්ෂණය

ඒ කාලෙත් තීක්ෂණට දුරකතන ඇමැතුම් එනවා. රසික රසිකාවියන් දැක්කහම කතා කරනවා. දැන් වුණත් එයාට රසිකාවියන්ගෙන් දුරකතන ඇමැතුම් එනවා. දැන් නම් එයාගෙන් ගොඩක් අය අහන්නෙ අක්කි ඉන්නවාද කියලා. අහලා මාත් එක්ක කතා කරනවා.

තාත්තා කෙනෙක් විදියට තීක්ෂණ

හැම වෙලාවෙම බබා එක්ක ඉන්නවා. බබාගේ වැඩ පුළුවන් විදියට කරනවා. බබා ඉපදුණ මුල් දවස්වල තීක්ෂණ රෑට නිදාගත්තෙ නෑ. මම දවල් නිදාගත්තෙ නෑ. දිගටම ඇහැරගෙන හිටියා. අපි මාරුවෙන් මාරුවට ඇහැරලා ඉඳලා තමයි පුතාව බලාගත්තේ.

තීක්ෂණ මුල් තැන දෙන්නේ

එහෙම විශේෂයක් නෑ. පවුල කියන දේට මුල්තැන දෙනවා. හැම වෙලාවෙම අපිත් එක්ක ඉන්න, කාලය ගත කරන්න එයා කැමැතියි.

කැමැති පුරුදු

මම තීක්ෂණගේ අකැමැතිම පුරුද්ද තමයි හැමතිස්සෙම නිදාගන්න එක. නිදාගන්න එකට මගෙන් බැනුම් අහනවා. එයාට නින්ද නැතිවම බෑ.

තීක්ෂණ ඇබ්බැහි වුණ දේ

ෆිල්ම්ස් බලන්න තමයි ඇබ්බැහි වෙලා ඉන්නේ. නිතරම ෆිල්ම්ස් බලනවා. රෑ එළිවෙනකම් හරි ඒවා බල බල ඉඳියි.

සමීපම යාළුවෝ

ගොඩක් යාළුවෝ නෑ. මනෝජ් කියලා ඉස්කෝලේ කාලේ ඉඳන්ම හිටපු යාළුවාව තමයි තාමත් ගොඩක් ළඟින් ආශ්‍රය කරන්නේ. ක්ෂේත්‍රයේ නම් එක්කෙනෙක් කියලා නෑ. හැමෝම ආශ්‍රය කරනවා.

යාළුවෝ අතරේදී

ඇත්තටම තීක්ෂණට ගොඩක් යාළුවෝ ආශ්‍රය කරන්න වෙලාවක් නෑ. යාළුවෝ අතරත් සුපුරුදු චරිතයම තමයි තීක්ෂණගේ තියෙන්නේ. එයා ඉන්න තැන හරිම ජොලියේ ඉන්නවා.

සැබෑ ජීවිතයේ කොයි වගේ කෙනෙක්ද

ඇත්තටම තීක්ෂණ ටී.වී. එකේ ඉන්නවා වගේ තමයි. ගෙදර ඉන්නකොටත් නිතරම හිනා වෙලා ඉන්නවා. එයා බබාත් එක්ක ඉද්දී පොඩි ළමයෙක් වගේ.

විලාසිතාවලට තියෙන කැමැත්ත

තීක්ෂණ හරිම සිම්පල් කෙනෙක්. ගොඩක් විලාසිතා කරන්නේ නෑ. ඒවා පස්සෙ යන්නේ නෑ. ගොඩාක් විලාසිතා කරන කෙනකුත් නෙවෙයි.

තීක්ෂණ යන්න කැමැති තැන්

තීක්ෂණ ගොඩක් ඇවිදින්න කැමැතියි. නිදහස් වෙච්ච ගමන් කොහේ හරි ඇවිදින්න යනවා. එහෙම එක තැනක කියලා යන්නෙ නෑ. ඇවිදින්න තියෙන තැන්වලට තමයි කැමැති.

තීක්ෂණගේ සින්දුවලින් අකැමැතිම සින්දුව

තීක්ෂණගේ සින්දුවලින් මම කැමැතිම නැති සින්දුව තමයි බෝඩිම. ඇත්තටම ඒ සින්දුවේ විෂුවල් එක තීක්ෂණට මැච් වෙන්නෙ නෑ.

(උදාරා ඉන්දිවරි ජිනදාස)

'කළුවර වැටෙනවාත් එක්කම මේ කියන බය මට දැනෙන්න ගන්නවා' - රිතු ආකාර්ෂා

මා ගැන ගොඩක් දෙනෙක් නොදන්නා රහසක් තියෙනවා. ඒ තමයි මම කළුවරටයි, හොල්මන්වලටයි බයයි කියන කාරණය. හැබැයි ඉතින් මගේ මේ බය ගැන අද මුළු රටම දැනගන්නවා. කමක් නෑ…. මම අද ඒ රහස හෙළි කරන්නම්.

මේ කියන බව මගේ හිතට ඇති වුණේ කොයි කාලෙද කියලා කියන්න නම් මම දන්නේ නැහැ. හැබැයි පුංචිම පුංචි කාලේ ඉදලා මම හොල්මන්වලට හරිම බයයි. අදුරු තැනක මහ රූ තනියම ඉන්න එක නම් මට හිතාගන්නවත් බැරි දෙයක්. ඉස්සර මම පුංචි කාලේ අපේ අයියාට මාව බය කරන්න ඕන වුණාම කරන්නේ හොල්මන් ගැන කතා කියන එකයි. අයියා මට ඇහෙන්න බොරු කතා ගොතලා කියනවා. හොල්මන් දැකපු අයගේ අත්දැකීම් විස්තර කරනවා. ඒ වෙලාවට මම ගොඩක් බය වෙනවා. ඒ දරුනු බිය අදටත් ඒ විදිහටම තියෙනවා.

යක්ෂ, ප්‍රේත, භූත බලවේග මේ ලෝකේ තියෙනවාද නැද්ද කියලා විවිධාකාර මත දක්වන අය ඉන්නවානේ. ඒ වගේ ගුප්ත බලවේග තියෙනවාද නැද්ද කියලා මම හරියටම කියන්න දන්නේ නැහැ. ජීවිතේ කිසිම දවසක මම හොල්මන් අවතාර දැකලත් නැහැ. ඒත් මම හොල්මන් අවතාරවලට බයයි.

සාමාන්‍යයෙන් ඕනෑම කෙනෙක් රූ නින්දට යන්නේ කාමරේ විදුලිය නිවා දමලා. ලයිට් එළිය තියෙද්දී නිදියන්න බැහැ කියන එක තමයි බොහෝ අය කියන්නේ. ඒත් මට නම් ඒකේ අනිත් පැත්ත. මට නම් තනියම කළුවර කාමරයක් ඇතුළේ ඉන්න බැහැ. ඒ නිසා මම කාමරයේ ලයිට් ඕෆ් කරලා නාන කාමරයේ ලයිට් දානවා. එතකොට නාන කාමරේ එළිය කාමරයට එනවා. එතකොට හිතට බයක් දැනෙන්නේ නැහැ.

ගෙදරදී ඕනෑම කෙනෙකුට පුළුවන් තමන්ට ඕනෑ විදිහට ජීවත් වන්න. ඒත් පිට තැනකට ගියාම එහෙම බැහැනේ. දුර ඈත පළාත්වල රූගත කිරීම්වලට ගියාම අපිට ගෙදර වගේ ඉන්න ලැබෙන්නේ නැහැ. සමහර වෙලාවට සෙනග අඩු පාළු ප්‍රදේශවලත් ඉන්න වෙනවා. හොල්මන්වලට බය, කළුවරේ ඉන්න අකමැති මට මේ වගේ පරිසරයක තනියම කාමරයක ඉන්න කිව්වට මට එහෙම ඉන්න බැහැනේ. ඒ නිසා මම දුර පළාත්වල රූගත කරන කිසිම නිර්මාණයක් භාර ගන්නේ නැහැ.

මම මළ ගෙවල්වලට සහභාගි වෙන්නෙත් නැති තරම්. ඉස්සර නම් මළගෙවල්වල යන්නෙම නැහැ. දැන් ඉතින් අත්‍යවශ්‍යම එකකට යනවා. ඒ යන්නෙත් හරිම බයෙන්. දෙතුන් දෙනෙක්වත් ඒ වගේ ගමනකදී මාත් එක්ක යන්නම ඕනේ.

මම මෙහෙම කිව්වම කෙනෙක් විශ්වාස කරන එකකුත් නැහැ. මහ රූ ලයිට් නිවලා තියෙන මගේ නිවසට ඇතුළු වෙන්නත් මට බයයි. රූගත කිරීම් අවසන් කරලා මහ රූ තනියම ආවත් ගෙදර ලයිට් නිවලා නම් මම වාහනෙන් බහින්නේ නැහැ. වාහනේ හෝන් එක ගහලා ගෙදර අයව නැගිට්ටා ගත්තට පස්සෙයි මම වාහනෙන් බහින්නේ. මට හිතෙන්නෙම හොල්මනක් හරි අවතාරයක් හරි කළුවරේ කොයිම මොහොතක හරි මගේ ඉස්සරහට එයි කියලයි.

වරදක් නොකර ඇයි මම වැටෙන්නේ : ශලනි


ශලනි... අලුත් නිර්මාණයකට දායක වෙලා... දැන් ශලනි කියන්නද... මිතූ කියලා කියන්නද...?

ම්... ම්... ශලනි කියමු නේද...? හැබැයි දැන් මම මිතූ කියන නමටත් ආසයි. මේ දවස්වල මම වැඩිපුරම ඉන්නේ මිතූ කියන චරිතයෙන්ම තමයි. මිතූ ප්‍රතාපසිංහ කියන්නේ දිවයිනේ ප්‍රසිද්ධ ව්‍යාපාරිකයෙකුගේ එකම දියණියයි. මිතූ ඉතා සැපවත් කෙළිලොල් ජීවිතයක් ගතකරන හරිම සැහැල්ලුවෙන් ජීවිතේ ගතකරන තරුණියක්. හැබැයි ඒ සැහැල්ලුකම දෙදෙරා යන්නේ මියුරු මුණගැහුණාට පස්සෙයි. මිතූ අධ්‍යක්ෂණය කරන්නේ ශාන්ත සොයිසා මහතායි. මේ නාට්‍යයේ තිර රචනය මහේෂ් රත්සර මද්දුමආරච්චි මහතාගෙන්. මහේෂ් අයියගේ නිර්මාණයකට දායකවුණු දෙවැනි වතාව තමයි මේ. ශාන්ත අයියා අධ්‍යක්ෂණය කරපු නාට්‍යයකට මම දායක වෙන පළවෙනි වතාව තමයි මේ. ලොකු කාලයකට පස්සේ තමයි මම මේ වගේ කොටස් දිගු නාට්‍යයකට සම්බන්ධ වුණේ. ඒකට ප්‍රධානම හේතුව වුණේ මේක මහේෂ් අයියාගේ වැඩක් නිසාමයි.

පසුගිය කාලයේදී ශලනි ටිකක් නිහඬව කාලය ගතකළානේ. ඔය කාලය ඇතුළත නිර්මාණ කිහිපයකටත් ආරාධනා ලැබෙන්නත් ඇති...?

ඔව්... නිර්මාණ කිහිපයකටම ආරාධනානම් ලැබුණා. ඒ අතරින් කිහිපයක්ම මම ප්‍රතික්ෂේප කළා. දීර්ඝ ටෙලිනාට්‍ය බාරගන්න ටිකක් අකමැතියි. මගේ ප්‍රථම සහ අවසාන රඟපාපු දීර්ඝ නාට්‍යය තමයි වස්සාන ප්‍රේමය. ඒක අතිශයින්ම ජනප්‍රිය වෙච්චි නාට්‍යයක්. ඊට පස්සේ මම දීර්ඝ ටෙලිනාට්‍යයකට සහභාගී වුණේ නැහැ. කාලයක් ටිකක් නිහඬව ඉඳලා ලැබුණු අපූරු නිර්මාණය මට කරන්න බාර වුණා.

නිර්මාණ බාරනොගත්තට පසුගිය දිනවල ශලනි ටිකක් කාර්යයබහුල වුණා...? හැබැයි ඒ රංගනයෙන් නෙමෙයි නිවේදනයෙන්...?

ඔව්... පසුගිය දවස්වල ෂූටිංවලින් කාර්යබහුල වෙලා හිටියේ නැහැ. හැබැයි අර කිව්වා වගේම එක්තරා වැඩසටහනක් නිසා මම කාර්යබහුල වුණා. ඒකේ අවසන් මහා තරගයට දැන් සූදානම් වෙනවා. ඇත්තටම ඒ වැඩසටහනටත් මම සහභාගී වුණේ හරිම ආසාවෙන්. ඉතින් ඒකේ වැඩකටයුතුත් එක්ක දවස ගෙවුණා. කාර්යබහුල වුණා. කොහොමටත් මේ මිතූ ටෙලිනාට්‍යයෙන් පස්සේ තවත් ටෙලිනාට්‍යය තුනක්ම මම බාරගත්තා. ඉතින් ඉදිරියේ දී රංගනය පැත්තෙනුත් ටිකක් කාර්යබහුල වේවි.

කොහොමද දිනක්ෂි, අසේකා, කියන යාළුවෝ දෙන්නත් එක්ක ගතකරන ජීවිතේ... ඒ යාළුකම හරි අපූරුයි නේද...?

ඇත්තටම ඔව්... ඒ යාළුකම හරි අපූරුයි... මූනිච්චාවට ඉන්න යාළුවෝ නෙමෙයි ඒ දෙන්නා. ජීවිතේ සැපේදීත්, දුකේදීත් හිත ළඟින්ම ඉන්න අපූරු බැඳීමක් තමයි ඒ... දිනක්ෂිව මම අවුරුදු ගාණක් තිස්සේ ඉඳන් දන්නවා. ඒක අපි දෙන්නා ටෙලිනාට්‍යවල හම්බවෙලා ඇතිවුණු යාළුකමක් නම් නෙමෙයි. අවුරුදු ගාණක් දිනක්ෂිගෙයි මගෙයි යාළුකම තිබුණට අපි දෙන්නා මුලින්ම එක නිර්මාණයකට දායක වුණේ “බටහිර අහස ටෙලිනාට්‍යයෙන්. හැබැයි ඒකේදී අපි දෙන්නට දෙබසක්වත් නැහැ. ඊට කලින් අපි දෙන්නා එක ටෙලිනාට්‍යයක රඟපෑවා. හැබැයි ඒකේදීත් අපි දෙන්නා මුණගැහෙන්නෙවත් නැහැ. “ඒක දිග කතාවක්. කියලා ටෙලිනාට්‍යයක් ළඟදී විකාශනය වෙන්න තියෙනවා. ඒ ටෙලිනාට්‍යයේ අපි දෙන්නා ප්‍රධාන චරිත දෙකක් කරනවා. හැබැයි අපි දෙන්නට එකට රඟපාන්න ලැබෙන්නේ නැහැ. ඒ නිසා දිනක්ෂිගෙත් මගෙත් යාළුකම නිර්මාණවලට සීමා වෙන්නේ නැහැ.

කොහොමද අසේකාව මුණගැහෙන්නේ...?

මුලින්ම මට “රිදී රුයක් පුහුණුවීම්වලදී තමයි අසේකාව මුණගැහෙන්නේ. ඒ මුල් කාලේදීත් අපි තුන්දෙනා එහෙම හම්බවෙලා ලොකු සම්බන්ධයක් තිබුණේ නැහැ. පසු කාලයේදී අපිට කොහේද, කින්ද, මන්ද කියලා මතකයක් නැතත් අපි තුන්දෙනා ගොඩාක් කිට්ටු වුණා. ඇත්තටම අද වෙද්දී අපේ ඒ යාළුකම හරි අපූරුයි.


ඔය තුන්කට්ටුවට ශනුද්‍රිවත් එකතුවුණා නේද...?

මෙහෙමනේ... ශනු අපිට වඩා ගොඩාක් පොඩියිනේ... ඉතින්... ශනු ගොඩාක්ම හිතවත් අසේකා එක්ක තමයි. දිනක්ෂි ඉතින් අක්කනේ... හැබැයි ශනු අපිට තාම ගොඩාක් පොඩි ළමයෙක්. ඒ වුණාට ඒ ගෙදර ගියාම ශනුත් අපිත් එක්කම තමයි. අපි කට්ටියම එකතු වෙන්නේ දිනක්ෂිලාගේ ගෙදර. අසේකාටයි, මටයි, දෙන්නටම වැඩක් නැත්නම් දිනක්ෂි ගෙදර ඉන්නවානම් අපි එහේ යනවා. ඉතින් වැඩියෙන්ම ඉන්නේ දිනක්ෂිගේ කාමරේ. ශනුයි, ශේෂාද්‍රියි දෙන්නත් ඒකට එනවා. ඉතින් ඊට පස්සේ අපි ෆිල්ම් බලනවා. දිනක්ෂිටයි, ශනුටයි හරි රසට උයන්න පුළුවන්. ඉතින් අපේ වැඩේම එයාලා හදන කෑම රස කර කර කන එක තමයි. සමහරදාට දන්නෙම නැතිව නින්දත් යනවා. නිවාඩු තිබුණම අපි එහේ මෙහේ යනවා එනවා.

ශලනිට හරි ලස්සනට ගීත රචනා කරන්නත් පුළුවන්. ඔයාගේ දෙවැනි ගීතය මේ වෙනකොට නිර්මාණය කරලා ඉවරයි...?

මගේ පළමු ගීතයට හිතුවටත් වඩා හොඳ ප්‍රතිචාර ලැබුණා. “යළි හමුවෙමු කියලා තමයි එය හැඳින්වූයේ. ඒ ගීතය චැනල්වල ගී එකතුවල සති ගණන් අංක එකට තේරිලා තිබුණා. ප්‍රේක්ෂකයින්ගෙන් තාමත් හොඳ ප්‍රතිචාර ලැබෙනවා. නිරෝෂා අක්කා ඒක හරි අපූරුවට ගායනා කළා. ඇත්තටම මගේ පළමු නිර්මාණයෙන් මම ඒ තරම් ප්‍රතිචාරනම් බලාපොරොත්තු වුණේ නැහැ. ඒ තරමටම ඒක මට හීනයක් වුණා. ඉතින් දැන් දෙවැනි ගීතයත් කරලා අවසාන වුණා. “මා ඔබ හමුවන දිනේ කියලා තමයි ඒක ලිව්වේ. පසන් ලියනගේ තමයි ඒ ගීතය සංගීතවත් කළේ. ඒකත් අපි ඉතාම ඉක්මනින් මගේ ආදරණීය රසික රසිකාවන්ට අහන්න දෙනවා. පසන්ගේ මියුසික්වලට මම හරි කැමතියි. ඉතින් පසන් සින්දුවක් කරමු කියලා කිව්වා. ඊට පස්සේ තමයි සින්දුව ලිව්වේ. මුල්ම ගීතය විරහව කැටිවුණු ගීතයක්. ඉතින් මේක ආදරය ගැන කියන සුන්දර ගීතයක්. බලමු... මම මේ ගීතයත් හිට් වෙන්න ඕනෙම කියලා හිතල කරපු දෙයෙක් නෙමේ. ඒත්... මිනිස්සු ඒ ගීතයත් ආදරයෙන් වැළඳගනීවි කියලා විශ්වාසයක් තියෙනවා.

රංගනය, නර්තනය, නිවේදනය, පද රචනය, මේ හැමදෙයක්ම කරන ශලනි ගායිකාවක් වෙන්න බලාපොරොත්තුවක් නැද්ද...?

අම්මෝ නැහැ... මට ගායනය පිළිබඳ හැකියාවක් නැහැ කියලා මම දන්නවා. සින්දු කියන්න පුළුවන් අය ඕනෑතරම් ලංකාවේ ඉන්නවා. ඒ නිසා මම මට පුළුවන් දේවල් ටික කරගෙන ඉන්නවා. සින්දු කියන්නනම් යන්නේ නැහැ.

ඇත්ත කියන්න... වැඩිපුර කැමති නිවේදනයටද... රංගනයටද...?

මෙහෙමයි... ඔය හැමදේම සමබරව කරගෙන යන්න මම කැමතියි. රඟපාන්න ගොඩාක්ම ආසයි කියලත් මට හිතෙන්නේ නැහැ. අනෙක මම මොකක් හරි දෙයක් ලියන්නෙත් මට හිතිච්චි වෙලාවට විතරයි. මට දෙයක් හිතුනොත් යමක් හිතට දැනුණොත් මම ලියනවා. ඉස්සර ඉඳන්ම හිතට දැනෙන දුක සතුට හැමදේම මම ලිව්වා. පසුගිය කාලේ මම රඟපෑවේ නැත්තේ මට රඟපාන්න ඕනේ නැහැ කියලා හිතුණා. මට ටිකක් හැමදේකින්ම ඈත්වෙලා ඉන්න ඕන වුණා. ඒ නිසා මම වැඩ බාරගත්තේ නැහැ.

ඔය නිර්මාණවලින් ඈත් වුණු, නිහඬවෙලා හිටපු කාලේ මොනවද කළේ...?

හොඳට නිදාගත්තා... ඒ වගේම මගේ යාළුවන් එක්ක මගේ ගෙදර අය එක්ක කාලය ගතකරන්න ඉඩ ලැබුණා. විශේෂයෙන් ඒ කාලේ මම වැඩිපුරම හිටියේ දිනක්ෂිලා ගෙදර. ඉතින්... ඒ කාලේ ඒ විදිහට ගෙවුණා.

පසුගිය කාලේදී ශලනිට ගෑනු ළමයෙක්ට දරාගන්න බැරි සිදුවීම්, හිත් රිදීම් වගේම ඇතැමුන්ගේ චෝදනාවලටත් මූණදෙන්න සිද්ධ වුණා...?

මෙහෙමයි... මිනිස්සු දෙයක් දිහා බලන්නේ එක රාමුවකින්. ඒ රාමුවෙන් එළියට ගිහින් මිනිස්සු ඇත්ත දකින්න කැමති නැහැ. මේ දෙයින් ඇත්ත දන්න කොටසකුත් ඉන්නවා. ඇත්ත දන්නෙ නැති කොටසකුත් ඉන්නවා. ඇත්ත නොදැන මිනිස්සු චෝදනා කරන එක හරි වැරදියි. ඒ දේවල් ආයේ ආයේ අවුස්සන්න... ඒ දේවල් ගැන කතා කරන්න මම කැමති නැහැ. හැබැයි ඇත්ත ඔය කතාවෙන මිනිස්සු දන්න දේ නෙමෙයි. මිනිස්සු ඔය දන්නේ හතරෙන් එකයි. හතරෙන් තුනක් මිනිස්සු දන්නේ නැහැ. ඒ තුනෙන් දෙන්නෙක් ජීවත් වෙනවා. එක්කෙනෙක් ජීවතුන් අතරේ නැහැ. ඒ දෙන්නා කැමතිත් නැහැ මේ ඇත්ත කියන්න. ඒනිසා මේ කතාව කවදාවත් සම්පූර්ණ වෙන්නේ නැහැ. මේක අසම්පූර්ණ කතාවක්. හැබැයි මිනිස්සු දකින දේ ඇත්ත නෙමෙයි. ඇත්ත දන්නේ නැති මිනිස්සු මේක ලොකුවට ප්‍රශ්නයක් කරගත්තා.


මිනිස්සු මෙහෙම චෝදනා කරද්දී ඔය හිත හදාගත්තේ කොහොමද...?

මම ඔය සිද්ධිය වෙන්න කලින් මගේ හිත හදාගෙන ඔය ප්‍රශ්නෙන් අයින් වුණු කෙනෙක්. ඒක දන්නේ බොහෝම ටික දෙනයි. ඒක හොඳටම දන්න කෙනා අද ජීවතුන් අතරේ නැහැ. කොහොමෙන් කොහොම හරි මට මේ සම්බන්ධව බොහෝ දෙනා විවිධ චෝදනා කළා. බොහෝ මඩ ගැහුවා. සමහරු මම නිහඬව ඉන්න එකෙන්ම මාව වැරදිකාරිය කළා. ඕනෑම කෙනෙක්ගේ ජීවිතේ ළංවුණු සමීපතම කෙනෙක් අයින් වුණාම අපිට ඒ වේදනාව දැනෙනවා. ඒක නැහැයි කියන්න බැහැ. පිටින් ඉන්න කෙනෙක්ට ඒක දැනෙද්දී ළඟින්ම හිටපු කෙනෙක්ට ඒක කොච්චර දැනෙනවාද කියලා හිතන්න පුළුවන්නේ. හැබැයි එහෙම හිතන්නේවත් නැතිව මිනිස්සු ඇඟිල්ල දික්කළා. මම අද කාටවත් වැරදි කියන්නේ නැහැ. හැබැයි ඒ අය ඒ දේවල් දවසක ගෙනියාවි.

ඔය ප්‍රශ්නයට බොහෝ දෙනා මට විවිධ චෝදනා කරද්දී මාව නොමරා මරද්දී මගේ ක්ෂේත්‍රයේ මාව දන්න බොහෝ දෙනා මාව ආරක්ෂා කළා. මට හයියක් වුණා. මිනිස්සු මාව නොමරා වළලද්දී, මට චෝදනා කරද්දී ඒ හැමෝම මට හයියට හිටියා. ඒ වෙලාවේ මම මොනවා කිව්වත් ඒ දේවල් පිළිනොගත්තා. මටම ඇඟිල්ල දික්කරන්න බලාගෙන හිටපු පිරිසක් හිටියා. ඒ වෙනුවෙන් මම දන්න මගේ ක්ෂේත්‍රයේ අය මාව පරිස්සම් කළා. ඒ කාලේ මම වැඩිපුරම හිටියේ දිනක්ෂිලාගේ ගෙදර. දමිතා අක්කා, අසේකා, චන්න අයියා, හේමාල්, සාරංග අයියා, කවීෂා වගේ බොහෝ දෙනෙක් ඒ කාලය පුරාවට මට හයියක් වුණා. හැමවෙලේම මාව ඇවිත් බලලා ගියා. කාලෙත් එක්ක මගේ හිත හදාගන්න බොහෝ දෙනා මට උදව් කළා. මිනිස්සුන්ගේ කතන්දර, මිනිස්සු ගහපු මඩ මාව ශක්තිමත් කළා. ඒ මඩ ගොඩෙන්ම මම නැගිට්ටා. ඒ හැමවෙලේම හිතපු දෙයක් තමයි “මම වැරැද්දක් නොකර ඇයි මම වැටෙන්නේ. කියලා. මගේ හෘද සාක්ෂියට අනුව මම වැරැද්දක් නොකළා කියලා මම දන්නවා. කාට බොරු කලත් හෘද සාක්ෂියට බොරු කරන්න බැහැ.

මොනවද ශලනි ඉදිරියේදී තියෙන නිර්මාණ...?

ඉදිරියේදී චන්න පෙරේරාගේ “භාවාත්මා කියන ටෙලිනාට්‍යයක් ළඟදීම විකාශනය වේවි. ඒ වගේම සුපුන් රත්නායකගේ “ඒක දිග කතාවක් කියන ටෙලිනාට්‍යයක් ළඟදීම විකාශනය වේවි. ඊට අමතරව තව ටෙලිනාට්‍ය දෙකක විතර රඟපාලා තියෙනවා. චිත්‍රපට දෙකක් තිරගත වෙන්නත් තවත් චිත්‍රපට දෙකකට ආරාධනා ලැබිලත් තියෙනවා. ඉතින්... බලමු... මගේ අලුත් ගීතය තමයි මේ දවස්වල මගේ තියෙනව ලොකුම බලාපොරොත්තුව වෙන්නේ.


► Text – Dishani

'ලංකාවේ පැජන්ට් කියන්නේ තනිකරම බොරුවක්.'


ගීත රූප රචනා හා වෙළෙඳ දැන්විම් හරහා නිතර දකින සිල්වියා හියුජ් වර්තමානය වනවිට වෘත්තිය මට්ටමේ නිරූපිකාවක් බවට පත්ව සිටියි. අද තරු කතා බහ දිග හැරෙන්නේ ඇය සමගය.

නිරූපිකාවක් විදිහට මේ දවස්වල කාර්යබහුලද?

ඔව්, භාරගත්ත වැඩ කිහිපයකටම පසුගිය දිනවල දායක වුණා. මේ දවස්වලත් නිරූපණ වැඩ කිහිපයකට සම්බන්ධ වෙලා ඉන්නවා. ඊට අමතරව ගීත රූප රචනා කිහිපයකටම පසුගිය කාලයේ දායක වෙලා හිටියා. 

රඟපාන්න කැමති නැද්ද සිල්වියා?

ගොඩක් කැමතියි. හැබැයි හොඳ ස්ක්‍රිෆ්ට එකක් ලැබුණොත් විතරයි රඟපාන්නේ.


නිරූපණය හා රංගනය දෙකකින් එකක් තෝර ගන්න කිව්වොත්?

මම වෘත්තිය මට්ටමේ නිරූපණ ශිල්පිණියක්. නිරූපණය පිළිබඳව ලොකු හැදෑරිමක් කරලා තියෙනවා. ඒ වගේම දේශිය වගේම ජාත්‍යන්තර මට්ටමේ නිරූපණ ප්‍රසංග සඳහා සහභාගී වෙලා අත්දැකිම් ලබාගෙන තියෙනවා. ඒ හින්දා මම වැඩිපුරම කැමති නිරූපණය පැත්තට. 

ඒ කියන්නේ නිරූපිකාවක් විදිහට අද ලොකු ගමනක් ඇවිල්ලා තියෙනවා?

ඔව්, එහෙම කියන්න පුළුවන්. ආපස්සට හැරිලා බැලුවොත් නිරූපිකාවක් විදිහට ආපු මේ ගමන ගැන ගොඩක් සතුටු වෙන්න පුළුවන් මට. 

ලංකාවේ නිරූපිකාවකට තියෙන්නේ අඩු පිළිගැනීමක්?

පිළිගැනීමක් නම් කියන්න බැහැ. මම රැල්ලට යන කෙනෙක් නෙවෙයි. මම මගේ ස්ට්‍රයිල් එකට වැඩ කරන කෙනෙක්. අනික ෆුල් ටයිම් මොඩ්ලින්ග් කරන්නේ නැහැ.


ඒ කියන්නේ වෙනත් වෘත්තියක නිතර වෙලා ඉන්නවා කියන එකද?

ඔව්, මම රැකියාවක් කරනවා එකවුන්ටන් කෙනෙක් විදිහට.


රූපරාජිණි තරගවලට එහෙම යන්න අදහසක් නැද්ද?

අපෝ නැහැ. ලංකාවේ ෆැජන්ට් කියන්නේ තනිකරම බොරුවක් හා හොරුන්ගේ තොතැන්නක්.


නිරූපිකාවෝ කිව්වාහමත් සමහරු බලන්නේ වැරදි ඇසකින්?

එකට වගකියන්න ඕනා මොඩල් ලේබල් එක ගහගෙන මෙලෝ දෙයක් දන්නේ නැතිව ෂුට් එකක් දෙකක් කරලා මොඩ්ල් ෆිල්ඩ් එකට සුළු පිරිසකගේ වැඩ නිසා. 

නිරූපිකාවක් විදිහට ඉදිරිය ගැන හිතුවොත්?

නිර්මාණාත්මක වැඩ වලට දායක වෙන එක තමයි මම ප්ලැන් කරන්නේ. ඒ වගේම නව නිර්මාණවලට පෙනි ඉන්නත් මම ගොඩක් කැමතියි.


කතා බහා - බුද්ධික සේනාධීර

කැළණි දියඹේදී මරු හමුවූ නිළිය.

තුෂානි ද සිල්වා මේ වෙන විට ටෙලි නාට්‍ය සහ චිත්‍රපට නිළියක ලෙස ප්‍රසිද්ධියක්‌ ලබමින් එම ක්‍ෂේත්‍රයේ නැගී එන නිළියක ලෙස නම්දරමින් සිටි අයෙකි. නොසිතු මොහොතක සුළඟක ගසා ගෙන ගියා සේ ඇය වසත් සමයේ, සියල්ල අතහැර ගොස්‌ ඇත්තේය. 

කිසිදු හේතුවක්‌ නැතිවම සොබා දහම ඇයගේ හුස්‌ම පොද දිය යට සඟවා ගත්තේ ඉකුත් 16 වැනිදාය. තුෂානි සිය පවුලේ උදවිය සමග විනෝද චාරිකාවක්‌ ගියාය. ඒ කිතුල්ගලටය. 

 තාත්තේ අපි ෂූටින්වලට මෙහ ගඟකට ගියා. එතන හරිම ලස්‌සනයි. නාලා යමුකෝ. ඇය ඇවිටිලි කර තාත්තා කැමති කරගෙනය. අම්මාත් තාත්තාත් තුෂානිත් සිය දියණියත් සහෝදරිය සහ ඇයගේ පවුලේ උදවියත් කිතුල්ගලින් පහළට ඇද හැලෙන කැලණි ගඟෙහි ඇරඹුමේ වන දිය කඳෙහි ගිලී නෑවෝය. පැයක්‌ පමණ නා විනෝද වී ගොඩට විත් යළි තානායමට යන්නට පිටත්ව කකුලේ වැලි ගෑවි ඇති හෙයින් එය සෝදා ගෙන එන්නම් කී තුෂානි යළි ගලන දියපාර වෙතට ගියාය. ඇය යන අන්දම සියල්ලෝම නැවති බලා සිටියේ මේ අපගේ දියණිය අප හැර දමා යන්නටම යන්නේය යන හැගිමෙන් නොවුණද මවට කිසියම් කුකුසක්‌ දැනීදෝ දුව එහාට යන්න එපා මේ ළඟින් සෝදා ගන්න යෑයිද කීවාය. එහෙත් තුෂානි පෙර සසරේ පතා ආ පරිද්දෙන් මරුවා සොයා ගියාය. වියළි කොළ ගොඩක්‌ මත පා තැබූ ඇය හදිසියේම ගැඹුරට ගිලුනාය. විනාඩියක්‌ දෙකක්‌ ඇතුළත සියල්ල සිදුවී හමාර විය. 

 තුෂානිගේ පියා ලෙස්‌ලි ද සිල්වා ව්‍යාපාරිකයෙකි. මව රේණුකා උයන්වත්තය. වැඩිමහල් සහෝදරිය එරන්තිකා ද සිල්වාය. තුෂානි මහනුවර සීතාදේවි බාලිකාවේ ඉගෙනුම ලබා රඟපෑමට යොමු වූවාය. ඇය ගැන සිය පියා මෙසේ කියා සිටියේය.


අපේ පොඩි දුව පවුලට හරි ලැදීයි. හැම අවුරුද්දේම අපි විනෝද ගමනක්‌ යනවා අවුරුදු දවස්‌වල මෙදා ගියේ කිතුල්ගල. ලෙෂර්වල්ඩ් ගිහින් සිංදු කිව්වා. පරණ කතා කිය කිය හිනා වුණා. දුව හරිම ආසයි නටන්න සිංදු කියන්න. එයා හැම වෙලාවෙම සතුටින් ඉන්න කැමතියි. අපි මොනවා හරි කල්පනා කර කර හිටියත් එයා අපිට කල්පනා කරන්න දෙන්නේ නැහැ. ඉන්න ටිකේ සතුටින් ඉන්න ඕනි කියලා එයා කියන්නේ. අපිත් හැමදේම අමතක කරලා සතුටින් ඉන්නවා පොඩි දුවත් එක්‌ක. එදා උදේ මාත් එක්‌ක එක පිගානෙන් කෑවා. දවල්ට කොහෙන් හරි රසට කමු කිව්වා. ඒත් උදේ මගේ පිඟානෙන් කාපු ඉදිආප්ප ටික විතරයි මයේ කෙල්ල යන්න ගියා"

"කවදාවත් නැති තරම් නංගි මා එක්‌ක එදා රෑ කතා කර කර හිටියා. අපි දෙන්න යාළුවො වගේ. නංගි විනෝදෙන් ඉන්න කැමති... දැන් මට සහෝදර සෙනෙහසක්‌ නෑ" තුෂානිගේ සහෝදරිය කියා සිටියාය. 

"මට ඉවෙන් වගේ පහුගිය ටිකේ දැනුනා කරදරයක්‌ අත ළඟ කියලා... පොද්දිව නිතරම මං හීනෙන් දැක්‌කා. දැන් කෙල්ල හීනයක්‌ වගේ අපිව දාල ගියා. පොද්දී ගිලෙද්දී තාත්තා එයා ළඟට පනින්න හැදුවා. පොද්දීගේ දුව යන්න දුන්නේ නෑ. එපා සීයා ගහගෙන යයි කියලා ඇඬුවා. අනේ ඒ පුංචි ඒකිට තාම අවුරුදු දහයයි. දැන් අම්මා නැති දරුවෙක්‌.."

දුක්‌ අඳෝනා විලාප සියල්ල මද නැගී ආ සඳ රහසේම බැස ගියේ සෙන්කඩගල පුරවරයටද දුකක්‌ ඉතිරි කරමිනි.

ළඟදීම මම මනා­ලි­ය­ක් ­වෙ­න, තිසුරි යුව­නිකාගේ අත ගන්නේ සුරාජ්!

ගෙවුණු මාස කිහිපය පුරා රංගන ශිල්පිනියන් බොහෝ දෙනකුට මංගල සීනු හැඬවුණා. නුදුරේදීම කලා ක්ෂේත්‍රයේ දක්ෂ රංගන ශිල්පිනියකට මංගල සීනු හැඬවෙන්න නියමිතයි. ඇය තිසුරි යුවනිකා. ළමා නිළියක් ලෙසින් ක්ෂේත්‍රයට පැමිණෙන ඇය වර්තමානයේ නැතිවම බැරි රංගන ශිල්පිනියන් අතරින් එක් කෙනෙක් කිව්වොත් නිවැරැදියි. අලුත් අවුරුද්දේ අලුත් බලාපොරොත්තු සමඟ තිසුරි තමන්ගේ අනාගතය පිළිබඳව සැලසුම් කර ඇත්තේ කොහොමද කියලා හා හා පුරා කියලා රසඳුනට කිව්වා.

 සුබ අලුත් අවුරුද්දක් තිසුරි !

එසේම වේවා.

මේපාර අවුරුද්ද සමරන්න විශේෂ අමුත්තෙක් එකතු වුණා කියලා ආරංචියි.

නෑ නෑ... විශේෂ කෙනා එකතු වෙන්නේ ලබන අවුරුද්දේ.

තිසුරිත් නොබෝ දිනකින් මනාලියක් වෙනවා. මේ දිනවල වැඩ වැඩි ඇති නේද ?

ඔව්.. තව මාස කිහිපයකින් මාත් මනාලියක් වෙනවා. වැඩ කියන්නේ... වැඩ වැඩිත් නැහැ.. වැඩ අඩුත් නැහැ..

විවාහයට ප්‍රමාද වුණා වැඩි නැද්ද?

නැහැ. මම හිතනවා හොඳම කාලය තමා මේ ඇවිත් තියෙන්නේ කියලා. සමහරුන් ගේ මතයක් තියෙනවා ගැහැනු ළමයෙක් අවුරුදු 20, 21 ක වෙද්දී විවාහ වෙන්න ඕන කියලා. මම කිසිම වෙලාවක ඒ තැන හිටියේ නැහැ. මගේ වාසනාවට මාගේ අම්මයි තාත්තයි එතැන හිටියෙත් නැහැ. මගේ පෞද්ගලික මතය නම් අත්දැකීම් කෙසේ වෙතත් වයස පොඩ්ඩක් යනතුරු ඉන්න ඕන. මාගේ වාසනාවට මාගේ අම්මටයි තාත්තටයි මාව කලින් බන්දලා දෙන්න කිසිම හදිස්සියක් තිබුණේ නැහැ. සුදුසු වයස තමා මේ ඇවිත් තියෙන්නේ කියලා මම හිතනවා.

තිසුරි බලාපොරොත්තු වුණු සහකරුවමද ලැබුණේ?

හ්ම්.. ඔව්. කොහොමත් මම ඉස්සර ඉඳලම හිතාගෙන හිටියේ මම යාළු වුණොත් යාළු වෙන්නේ කවදාහරි විවාහ වෙන්න බලාගෙන කියලා. ඉතින් ඒ දේවල් හැම දෙයක්ම ඒ විදියට වුණා. සුදුසු කෙනා තමා මට මේ ලැබිලා ඉන්නේ.

ආදරය ගැන කතා කරමු ද?

කතා කරමු. අපේ ආදරේට අවුරුදු 4 ක් වෙනවා. ඔහු සුරාජ් විජේසිංහ. එයාගේ තාත්තයි මාගේ තාත්තයි හොඳ යාළුවෝ. ඒ නිසා අපිත් පොඩි කාලේ ඉඳන්ම යාළුවෝ. යාළුවෝ විදියට අපි ගොඩක් කල් හිටියා. කාලයත් එක්ක එයා එයාගේ හිතේ තියෙන දේ මට කිව්වා.

යාළුකම ආදරේට පෙරලෙද්දී තිසුරි ඔහු ගෙන් විශේෂයෙන් බලපු දේවල් ඇති නේද?

අපි පොඩි කාලේ ඉඳන්ම හඳුනන නිසා එයාගේ හැමදේම මම දන්නවා. එයත් එහෙමයි. ඉතින් මම හිතනවා ඒ දැන හැඳුනුම්කම උඩ තමා අපි දෙන්නගේ කැමැත්ත ඇති වුණේ. මාගේ යාළුකම ආදරයකට පෙරලූනෙත් ඒ නිසා වෙන්න ඇති.

ඒ වගේම මම හැමදාම කිව්වේ සහ හෙව්වේ මාගේ අම්මටයි තාත්තටයි පුතෙක් වෙන්න ඕන කෙනෙක්ව. මම පවුලේ එකම ළමයා. ඉතින් පවුලට සම්බන්ධ වෙන කෙනා අනිවාර්යෙන්ම හොඳ කෙනෙක් වෙන්න ඕන. සුරාජ් ඒ වගේ කෙනෙක්. මාගේ හිතේ මැවුණු කෙනා එයා තමා කියලා මට හිතුණා. එයා මගේ අම්මටයි තාත්තටයි ගොඩක් ආදරෙයි. ඒ හැමදේම මත යාළුකම ආදරේකට පෙරළුණා. ඒ දේවල් තමා ඉතින් විශේෂ වුණේ මට.

කලාව පැත්තෙන් මොනවද මේ දිනවල කරන වැඩ?

මේ දවස්වල සමන් කුමාර අයියගේ නේත්‍රා කියලා නාට්‍යයක් කරනවා. ඊට අමතරව මේ දිනවල විකාශනය වන උරුමයක අරගලය කියලා ටෙලි නාට්‍යක වැඩ කටයුතු සඳහා සම්බන්ධ වුණා. ඒ වගේම මම ඉදිරිපත් කරන විවාහ වැඩසටහන කරගෙන යනවා.

දැනටමත් රංගනය වෙනුවෙන් සිමා මායිම් පනවා ගෙන ඇති නේ?

නැහැ එහෙම එකක් නැහැ. එයා දන්නවා මම රඟපානවා කියලා. මම කවුද කියලා දන්නවා. ඉතින් ඒක නිසා මාගේ රැකියාවට කිසිම බාධාවක් වෙන්නේ නැහැ. මම භාර ගත්ත නිර්මාණ මම කරනවා. විවාහ වුණා කියලා මාගේ රංගන ජීවිතය බාධාවක් කර ගන්නේ නැහැ. හොඳ නිර්මාණ ලැබුණොත් මම කරනවා.

(නිලු­පුලි සඳ­කැ­ලුම් - සිළුමිණ)

ළඟදි බඳිනවද? එහෙනම් නටන්න.

Model : Diana K. Hettiarachchi
 | Ape Arts Photography| Dressing by Salon Ruwelma

විවාහය යෞවනයේ සුන්දරතම අවස්ථාව බවට විවාදයක් නැත. පාසල් විය අවසන් කළ පසු අති බහුතරයක් තරුණ පිරිස සිහින මවන්නේ 'ලස්සන වෙඩිංඑකක්' ගැනීමටය. එතනින් එහාට පවුල් කන විදිහ ගැන එතරම් තැකීමක් නැති වුවද වෙඩිංඑක නම් ලස්සනට තිබිය යුතුමය.

මෙවැනි හීන ගැන අපේ විවේචනයක් නැත. ජීවිතවල සිහින තිබිය යුතුමය. වෙඩිංඑක පමණක් නොව එතනින් එහාට ජීවිතයද සුන්දර විය යුතුය. එහෙත් තරුණ තරුණියන්ගේ සුන්දර සිහින අතරට මාකටිං කාක්කන් රිංගාගෙන මඩිය තර කර ගන්නේ නම්, ඔවුන්ගේ සිහින අලෙවි කරන්නේ නම්, එවැනි තැන් ගැන අවදියෙන් සිටිය යුතුය.

අද වන විට අපේ රටේ බොහෝ දෙනකුගේ ආදායම් මාර්ගය වන්නේ වෙඩිංය. ඔවුන්ගේ ආදායම සරු වීමට නම් දෙදෙනෙක් විවාපත් විය යුතුමය. මේ විවාපත්වන ප්‍රමාණය වැඩි නම් අතමිට සරුය. ආදායම හොඳය. ඒ නිසා බිස්නස්එක බෙහෙවින් තරගකාරීය. බොහෝ ලාභ ලැබිය හැකි නිසාම ෆීල්ඩ්එකට එන පිරිසද වැඩිය. ඊට සාපේක්ෂව කසාද බඳින්නන් අඩුය. ඒ නිසාම පළමුවැනි විවාහය දික්කසාද වී දෙවැනි වර විවාහ වන විටද රටට ලෝකෙට පේන්න හොඳ වෙඩිංඑකක් ගැනීමේ සංස්කෘතියක්ද ක්‍රමයෙන් මතුව ආවේය. ඇතැම්විට මෙය තෙවැනි විවාහ උත්සවය දක්වාද ඇදගෙන යන්නට සමත් වූ අවස්ථා විය.

මෙසේ කිරීමට තරම් ලැජ්ජා බය නැති පිරිස සාපේක්ෂව අඩු නිසාදෝ පළමුවැනි වෙඩිංඑක තුළම බොහෝ දේ විකුණා ගැනීමට කටයුතු කිරීමට වෙඩිං කාක්කන්ට සිදුව තිබේ. විවාහ උත්සවය විහිළුවක් වන්නට පටන් ගන්නේ එතැන් සිටය.

අතීතයේ අපේ රටේ විවාහ සංස්කෘතිය ගැන අමුතුවෙන් සිහිපත් කළ යුතු නැත. එක හිත ඇති බැවිනුන්, වංචාවක් කිරීමට හෝ වගකීම් පැහැර හැරීමට සිහිනෙකින් හෝ නොසිතූ බැවිනුත් නීති පොතේ සටහන් තැබීමක් අවශ්‍ය වූයේද නැත. ඉන්පසු පරම්පරාව සිහිවටනයක් ලෙස, දරු මුණුබුරන්ට ආදර්ශයක් ලෙස මගුල් දවසේ ඡායාරූපයක් ගෙන, රාමු කර හැමෝටම පෙනෙන ලෙස ගෙයි එළිපත්තට බසින තැන බිත්තියේ ඉහළින් එල්ලා තැබීමේ සංස්කෘතියක් විය.

මගුල් ෆොටෝ ගැනීම ලාබදායී ව්‍යපාරයක් බව වටහා ගත් පසු බිත්තියේ එල්ලූ ලොකු ෆොටෝඑක සමග ඡායාරූප ඇල්බමයක් පැමිණියේය. එයද ඉවසිය හැකිය. ඒ සියල්ල සිහිවටනය. නම්බුකාර විදිහට දීග ආ හැටි පරම්පරාවට පෙන්වන්නට අපූරුය. එහෙත් මේ ඡායාරූප ඇල්බමය ද එතනින් නැවතීමට සූදානම් වූයේ නැත.

ඇල්බම් එක එක විදිහට ආවේය. ඇතැම් එවා ඇල්බම් නොවේය. 'කතන්තර පොත්' ය. ඒ මදිවාට වීඩියෝ කරන්නටද කට්ටිය බිහි විය. මගුල් දවසේ සජීවී රූප රාමු සමග ඇද වැටුණු අවස්ථා, මනාලිය වඩාගෙන හති දමමින් වටේ කැරකුණු අවස්ථා, නහය කැසූ, හොටු හිරූ අවස්ථාද මේ වීඩියෝවට ඇතුළත් කර තිබිණ.

'වෙඩිං බිස්නස්එක' එතනින්ද නැවතුනේ නැත. මේ අලුත් ට්‍රෙන්ඩ්ස් බලා ගැනීමට තරම් වෙඩිංවලට ඉන්විටේෂන් ‍ලැබෙන්නේ නැත. එහෙම වෙනඑක ගැන නම් අමනාපයක් නැත. නැතිනම් කරන්නට වන්නේ ඉතා අධික මිලක් වියදම් කර, ඇඳ පැලඳ, තෑගි බෝගද ගෙන ගොස් ඔහේ ඉඳගෙන ඉඳලා ගෙදර එන්නට සිදුවීමය.

එහෙත් මේ මිල අධික වෙඩිං බිස්නස් ගෙදර සාලයේ ඉඳගෙන, ඉතා සැප පහසුවට නොමිලේම බලා ගැනීමේ අවස්ථාව අපට අනේක විධ රූපවාහිනී නාලිකා මගින් උදා කර දී තිබෙන්නේය. සති අන්තයේ දවසක අහම්බෙන් හෝ රූපවාහිනිය ක්‍රියාත්මක කෙරුණ‍හොත් මෙවැනි වැඩසටහන් පහ හයක්ම දැක ගැනීමට හැකිය. මේ ලියන්නට හිතුනේද එවැනි වැඩසටහන් දැකීමෙන් ඇති වූ විශ්මය නිසාමය.

පුදුම වූයේ අන් කිසිවකට නොවේය. මේ වෙඩිං බිස්නස්එක ගොස් ඇති දුර වැටහී යෑමෙන්ය.

දැන් ‍මනාලියට සහ නහුතයක් පමණ කණ්ඩායමට ඇන්දවීමෙන් සහ ‍ෆොටෝ, වීඩියෝවලින් වෙඩිං බිස්නස්එක බොහෝ දුර ගොස්ය. එය කොතරම් දුර ගොස් ඇතිදැයි කිව හොත් මගුල් දවසේ මනාලිය ඒක පුද්ගල රංගනයක් ඉදිරිපත් කරන්නීය. ඉන් පසුව මනාලයා සිය මිතුරන් සමග තවත් රංගනයක් ඉදිරිපත් කරන්නේය. මල් කුමර කුමරියෝ තවත් නැටුමක් නටති. ඉන් පසුව නටන්නේ සල්ලි දීලා ගෙන්වා ඇති නැටුම් කණ්ඩායම්ය. මනාලියගේ සහ මනාලයාගේ මව, පියා ඇතුළු ඥාති සනුහරය නටන්නේ අන්තිමටය.

කොටින්ම කිව හොත් අද කාලේ වෙඩිංඑකකට යෑම හරියට බණ්ඩාරනායක සම්මන්ත්‍රණ ශාලාවේ රීදී රැයක් බලනවා හා සමානය. රීදී රැයක්ද බලා සිටීමට අමාරුය. එමෙන්ම මේ වෙඩිං නැටුංද බලා සිටීම ලෙහෙසු පහසු ක්‍රියාවක් නොවේය.

මට දක්නට ලැබුණු එක් වෙඩිමක මනාලිය මාල හත සමග ඔසරියකින් සැරසී, මල් පොකුර පසෙක තබා, සබා මැදට පැමිණ වේගවත් ඒක පුද්ගල නර්තනයක නිතර වූවාය. ඇය වෙඩිම වෙනුවෙන්ම නටන්නට පුහුණු වන්නට ඇතැයි සිතුණු සිතිවිල්ල තහවුරු කළේ නම්‍යශීලී නොවූ මෙන්ම, නර්ථනය ගෑවී හෝ නැති ඇයගේ සිරුරය. ඒ බව රූපවාහිනිය බලා සිටි මට මෙන්ම තවත් බොහෝ දෙනාට වැටහෙන්නට ඇත. එමෙන්ම මේ නර්ථන අයිඩියාඑක ලබා දී පුහුණු කළවුන්ටද ඇස් නැතිවා වෙන්නට බැරිය. එහෙත් ඇය එයින් වළකන්නට කිසිවකු කටයුතු කර තිබුණේ නැත.

ගොං අං තට්ටුවක් පැලඳ පුටුවක හිඳ සිටි මනාලයා වටා කරකැවෙමින් නටමින් ගිය මිතුරන් පිරිසක් 'ළපටි කැකුළු නාඹර වස්සා' කසාද බඳින බව පැවසූහ. ගීතය අති සුන්දරය. එහෙත් තමන්ට 'නාඹර වස්සා' යැයි පවසා ගැනීමට දහස් ගණන් වියදම් කිරීමෙන්ම මනාලයා 'නාඹර වස්සකු' බව ඔප්පු විය.

දැන් වෙඩිං හෝල්වල හෙවත් උත්සව ශාලාවල අසුන් පනවන්නේම නැටීමට ඉඩ ප්‍රමාණවත් වන පරිදිය. උත්සවයට සහභාගී වන අමුත්තෝ කෑම වෙලාව එනතුරු මනාලියගේ හෝ මනාලයාගේ හෝ නැතිනම් සමස්ත කණ්ඩායමේ හෝ ‍නැටුම් බලමින් සිටිති. නටන්නට බැරි යැයි බුද්ධිමත් ලෙස ස්වයං තක්සේරුවක නිරත වන මනාල මනාලියෝ ඒ වෙනුවෙන් මුදල් ගෙවා නැටුම් කණ්ඩායම් කැඳවති. එලෙස පැමිණෙන නැටුම් කණ්ඩායම් කරන්නේ උත්සවයේ සියලු දෙනාගේ අවධානය තමන් වෙත ලබා ගනිමින්, මනාල යුවළ දෙවැනි තැනට දමමින් නර්ථනයේ නිරත වීමය.

මීට අමතරව සෞභාග්‍යය සංඛේතවත් කරමින් රසායනික ද්‍රව්‍ය දමා උතුරුවන කිරි දහරාද වේ. මනාල යුවළ නොයෙක් අන්දමින් පෙනී සිටින ස්තුති පත්‍රිකාය. ඒ සේරටම වඩා වටින්නේ මංගල දිනයට පෙර ගන්නා අති විශාල මුදලක් වියදම් වන pre shoot හෙවත් පෙර ඡායාරූප ගැනීමය. ඒ වෙනුවෙන් ඇඳීමට ඇඳුම් හදා ගැනීමට මංගල ඇඳුමට වඩා වියදම් යන බව ප්‍රසිද්ධ කරුණකි. ඇතැම් දෙනා මේ වෙනුවෙන්ම පිට රටකටද යන්නේ තමන් පෙර ගත කළ ජීවිතය වඩා හොඳින් විද්‍යමාන කිරීමට ‍වන්නට ඇත. එහෙත් pre shootඑකට හැර ඒ රටට මීට පෙර නොගිය අයද පෙර ජීවිතය විද්‍යමාන කිරීමට තැත් දැරීමද වෙනම කතාවකි.

මේ කතා සියල්ල අතරේ පැවසිය යුතු එක දෙයක් ඇත. එනම් තරුණ විය යනු ෆැෂන්, ට්‍රෙන්ඩ් සමග මෝඩකම් මෙන්ම නුවණක්කාරකම්ද එකසේ මිශ්‍රවන අවධියක් බවය. කර ඇත්තේ මෝඩකම්ද, නුවණක්කාරකම්ද යන්න තීරණය කරන්නේ මැදි විය හෝ මහලු වියය. එහෙත් ඉහත කී සියල්ල තරුණ විය හා සම්මිශ්‍ර වූයේ නැතිනම් ඒ තරුණ වියෙන්ද වැඩක් නැත.

මේ සියල්ල විවේචනාත්මක ස්වරයෙන් කීවද මේවා කරන්න එපා යැයි ඔබට කියන්නේ නැත. හැබැයි එක දෙයක් නම් කිව යුතුය. වෙඩිංඑක දවසේ නටන්නට හිතනවා නම් තමන් ගැන ස්වයං විවේචනයක් පවත්වා ගැනීම යහපත්ය. එහෙම බැරි නම් කල් තියා පුරුදු වීම පසුකාලීනව ඇති විය හැකි මරණීය ලැජ්ජාවකින් ඔබව ගලවා ගනු ඇත.

-ටිරෝනි වෑවලගේ